ទឹកធ្លាក់តាមតំបន់ភ្នំ បឹងបួរ ស្ទឹង ប្រឡាយ ទំនប់ និងរមណីយដ្ឋានកែច្នៃខ្នាតតូចនានា បានធ្វើឲ្យខេត្តកំពង់ឆ្នាំង ក្លាយជាខេត្តគោលដៅដែលមានសក្តានុពលទេសចរណ៍ដែលរពឹងថានឹងមានបងប្អូនប្រជាពលរដ្ឋទៅលេងកម្សាន្តច្រើននៅនារដូវបុណ្យភ្ជុំនេះ។
លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំង បានអោយដឹងថា ខេត្តកំពង់ឆ្នាំង បានត្រៀមលក្ខណៈរួចរាល់ហើយ ដើម្បីទទួលភ្ញៀវទេសចរនៅក្នុង ឱកាស ពិធីបុណ្យភ្ជុំបិណ្ឌឆ្នាំនេះ។
ជាមួយគ្នានោះ លោកបន្ថែមថា មន្ទីរទេសចរណ៍ខេត្តកំពង់ឆ្នាំង ក៏បានត្រៀមខ្លួនរួចដែរ ក្នុងការរៀបចំ សណ្តាប់ធ្នាប់ និងការពារសុវត្ថិភាព ជូនភ្ញៀវទេសចរណ៍នៅរដូវបុណ្យភ្ជុំបិណ្ឌឆ្នាំ២០១៩នេះ។ ជាពិសេសចុះផ្សព្វផ្សាយអប់រំណែនាំ អំពីអនាម័យបរិស្ថានដល់អ្នកលក់ដូរនៅតំបន់ទេសចរណ៍កម្សាន្ដនានា ក្នុងខេត្តផងដែរ។
គួរបញ្ជាក់ថា របាយការណ៍របស់ក្រសួងទេសចរណ៍ រយៈពេល៣ថ្ងៃ ចាប់ពីថ្ងៃទី៩-១១ខែតុលា ឆ្នាំ២០១៨នៃពិធីបុណ្យភ្ជុំបិណ្ឌ មានភ្ញៀវទេសចរជាង ១៦ម៉ឺននាក់ ទៅលេងកម្សាន្តរមណីយដ្ឋាននានា ក្នុងខេត្តកំពង់ឆ្នាំង។ ក្នុងនោះ តំបន់ទេសចរណ៍នៅក្នុងខេត្តពង់ឆ្នាំង ដែលមានភ្ញៀវទេសចរណ៍ ទៅលេងច្រើនជាងគេ រួមានមាន ទំនប់ស្ទាក់ទឹកស្ទឹងគង្គា ទឹកធ្លាក់អន្លង់ស្វាយ ទឹកធ្លាក់ថ្មក្រាល ទឹកធ្លាក់ស្រែអំពិល ស្ថិតក្នុងស្រុកទឹកផុស ទំនប់២០ឧសភា ស្ថិតក្នុងស្រុករលាប្អៀរ ទំនប់ស្ទាក់ទឹកអាចាង តំបន់ខ្សាច់ស ស្ថិតក្នុងស្រុកបរិបូណ៌ និង មាត់ទន្លេផ្សារក្រោម ក្នុងក្រុងកំពង់ឆ្នាំង៕
អត្ថបទ៖ ហឹង ចូច
